喜欢TA就送TA去首页！
发表评论
【音頻】粵劇粵曲『牡丹亭驚夢 之 幽媾』
仙鳳鳴粵劇團 任姐（任劍輝）、仙姐（白雪仙）、波叔（梁醒波）爲1962年颱風“溫黛”賑災所錄製。
任劍輝（飾）柳夢梅 ...(更多)
【音頻】粵劇粵曲『牡丹亭驚夢 之 幽媾』
仙鳳鳴粵劇團 任姐（任劍輝）、仙姐（白雪仙）、波叔（梁醒波）爲1962年颱風“溫黛”賑災所錄製。
任劍輝（飾）柳夢梅
白雪仙（飾）杜麗娘
梁醒波（飾）陳最良
（排子頭一句開幕）
（琵琶獨奏風吹桐業一段）
（夢梅攬真容坐幕，開幕慢板長序）（白）桃花庵觀湧雲霞，芍葯煙籠太守家，是誰檀匣藏小軸，夜雨挑燈細看查。（寶子托白）我客館蕭條，偶遊庵觀，拾來一軸小畫，似是觀音大士，寶匣莊嚴，待我合什挑燈，案前瞻禮至得（鑼鼓打開畫介慢的的）唉口也，哦，又不似觀音，又不似是嫦娥，卻是似曾相識一位名門佳麗，呀，口係邊處見過佢呢口下？奇叻（將畫掛在燈柱起唱主題曲：柳望玩真）不似是觀音。觀音有座蓮花襯，若是莊嚴大士，焉有雲髻堆鴉。。又不似是嫦娥，嫦娥應有祥雲鎖。若是被眨凡塵，應有彩虹高駕。。待我燈下看丹青，拭目重新認，我不是重來崔護，何以人面似桃花。飄零客是柳夢梅，畫中人似曾相會，何以佢手上有青梅，我夢中長鰥寡。。（白）呀，呢幅丹青畫，睇真口下，原來就係我個夢中人口黎喎，唉口也（小曲剪剪花）此畫原無價，還似月籠紗，奇逢心驚詫，睇佢意態殊文雅，待我挑燈看真她，我看真她，要看真她，卻有蠅頭詩待查。（反線中板下句）佢畫法傲崔徽，筆雅如蘇蕙，衛夫人美女簪花。是一首宋元詞，還是晉唐詩；是白頭吟，還是癡心話。（一才收讀詩介白）近睹分明似儼然。。遠觀自在若飛仙。。他年得傍蟾宮客。不在梅邊在柳邊。。（續唱）此句奈人參，嗟莫是梅和柳，有多少籐葛交加。。若說沒奇緣，誰渡我芍葯欄邊，湖山石下。緣若証前生，何以纖娥留倩影。（轉二王下句）害得我紙上醉風華。。恨不能抱影而眠，我移向錦屏低掛（將畫掛在錦屏風處，愈看愈愛介白）我呢個夢中人，我相信都幾難見得到佢面，但係有幸比我見到佢
口既丹青畫，我能不酬詩口黎寄意呢？好...（拈筆舐墨題詩酬和於畫上，寫一句，念一句）丹青妙處卻天然。。不是天仙即地仙。。欲傍蟾宮人近遠。恰比春在柳梅邊。。
（鑼邊風起，燭花掩映）（風鑼介）
（夢梅花下句）畫中人似對我微含笑，惱煞無端風起亂燈花。。叫一句畫裡真真（介）哦，念到佢無姓無名聲黯啞（夢梅白）佢又無姓無名，我都不知如何呼喚口番，倒不如就叫聲姐姐罷叻（一才）（略覺不好意思細聲介白）姐姐...姐姐，為使芳魂能入夢，何妨半啟紗窗去夢她（推窗埋帳睡，不須落帳）
（風聲，梧桐葉，燭花吐藍色大焰。請注意麗娘鬼魂出場前後一切效果）
（麗娘掩土介小曲倩女魂引子）風吹梧桐葉落沙喇...喇，風吹梧桐葉落沙喇...喇。（飄忽三次入場）（倩女魂）粉冷香銷，泣絳紗，風飄飄，魂在望鄉台下，夜螢螢，墓門開處鬼離家。行一步，心驚怕（內場犬吠聲，麗娘驚介）哦，原來是賺花陰，夜犬吠螢花（介）倩芭蕉遮掩在荼薇架（內場打更聲，麗娘驚介）原來是樵樓鼓，落寒更報月華，休怕，休怕，待重見窗裡冤家，重續孽緣燈月下。（寶子直玩行近埋小樓梯畔欲上介）（麗娘敲門三聲風滅殘燭介）
（夢梅矇矓中醒介白）唉口也，月色透羅幃，已是更深時候啦，重有邊個口黎敲門呢口下......呀，大抵是雨打竹簾，風搖鐵馬定叻。（梅睡介）
（麗娘微聲叫白）開門。
（夢梅再愕然坐起介白）明明係有人叫門之聲口架口番。（介）係邊位呀？
（麗娘白）是我。
（夢梅白）係女人聲口黎口番。呀，梗係口個個小道姑佢送茶問暖定叻（貼門介）韶陽師姐，夜叻，唔駛叻。
（麗娘輕輕頓足介白）開門呀。
（夢梅白）佢又唔扯口番，又係口既，人地一場心事，送茶問暖，唔開門又點得呢，不如開口左度門，接過杯茶，打發佢扯罷叻。點番枝蠟蠋先（寶子點蠟燭開門三照介）
（麗娘三避介側身含羞坐下介）
（夢梅驚白）唉口也...唉口也，奇...奇怪叻，點解開口左度門，莫講話人影都冇，鬼影都冇，點解呀？唉口也，唔通呢度真係有鬼，咪講笑，閂番度門，訓覺罷叻。
（麗娘細聲白）柳公子。
（夢梅見麗娘慢的的驚震欲走避介白）呢位小姐，我同妳素昧生平，點解妳識得我口架？
（麗娘口古）柳公子，素昧生平都仍可相逢夢裡囉，咁相逢又何必要問相識呢？我...我望你珍重良宵剎那。
（夢梅口古）小姐，到底妳駕雨而來，抑或乘風而入口架？（驚介）妳幾時入口左口黎我都唔知口既，真係嚇到我心...心搖意蕩眼昏花。。（欲避介）
（麗娘口古）柳公子，所謂最難風雨故人來，不是故人又怎能乘風駕雨呢，你何必要問我點樣口黎唧，我究竟都係口黎口左囉，其實，我在你心生綺念口既時候已經口黎口左啦，哎口也，公子，咁你既怕又何必想，既想又何必怕呢？
（夢梅口古）我...我幾時有心生綺念呀，縱使有，不過都係客館寂寥，想念口下畫裡口既嬌娃唧。。
（麗娘一笑掩唇橫波顧即起雙星恨寶子逐級下芳苑倚芭蕉樹下低頭玩弄絳紗介白）你落口黎啦。
（夢梅白）叫我落口黎？
（麗娘應聲）唔。
（夢梅跟住梯畔下樓食住寶子，自言自語介白）唉口也，本來佢不明來歷，我應該要避之則吉，不過你睇口下佢，你睇佢意態撩人，斜倚在芭蕉樹下，輕弄絳紗，真係好容易令人心...心生綺念口架，唔得，我要問真口下你至得，小姐（雙星恨唱）月裡仙降凡塵，佢輕弄絳紗，輕弄絳紗，莫非冷煙蔽月華，她雨中竟自迷途迷途錯歸家。（白）妳係唔係呀？
（麗娘搖頭介白）唔係（接唱）我寄寓寄寓在柳陰下，悲風霜乞片瓦（黯然介）
（夢梅上前一揖介接唱）我非關有意有意苦追查，夜半芳齋欠奉茶，妳莫借西廂送葯茶，我借盞秋燈你小心歸去罷。
（麗娘搖頭介接唱）唉，嘆惜我命如霧裡花，杜麗娘未有家泣孤寡。（白）我...我無家可歸口既。
（夢梅愕然食住序白）哦，原來妳連家都冇口架？世間女子焉有無家之理口架，呀，我知啦（續唱曲）莫非天仙姐姐妳愛我瀟洒，偷偷降落柳生衙，可惜我一介潦倒潦倒口既寒儒怕有偏差。（作不敢介）
（麗娘苦笑搖頭介白）你錯叻（續唱）既屬有夢鑄佳話，當管不了月夜，月夜叩奔君家，我慕君風華，我愛君風華，盼君泣月下，屈居柳陰受霧雨打，盼蝶來活了解語花（哭介）
（夢梅愕然介白）小姐，點解妳忽然又淚隨聲下口架。（接唱曲）佢泣訴多風雅，悲逝水韶華，呀，妳欲仿效情花再萌芽（白）小姐，妳是否係文君新寡？
（麗娘白）唔係（續唱，雙星恨）貞花未嫁口架（覺羞）
（夢梅驚喜介白）呀，妳未嫁口架？
（麗娘續唱）我獨處深閨未嫁口架（但唱至此應步至衣邊角樹）
（夢梅接唱）既是天仙天仙未嫁，哎口也亦緣也，咁就福份也（欲親近又不敢介）哎口也，想落心中驚怕，心中驚怕，點解會相見焦樹下。
（麗娘一笑接唱）君心休怕，君心休怕，君不記你揖拜仙觀下，風吹飛花有心報與君，在佛前為你洒，致令郎拾去我丹青畫。
（夢梅尚帶驚介白）咁到底妳從何而來口架？
（麗娘白）公子，你何必疑雨疑雲，驚風怕雨唧...丹青畫丹青畫...我生於畫中，當然係來自畫中啦。
（夢梅白）來自畫中？莫非妳就係畫裡真真？
（麗娘白）你睇真口下。
（夢梅白）我對真口下。
（夢梅急上小樓取真容復下向麗娘三對狂喜介）
（麗娘白）係唔係呀？
（夢梅白）哦，真係口番。
（麗娘笑介續唱雙星恨）咁真與假呢？
（夢梅接唱）確未有差。（掛畫於樓前）
（麗娘接唱）祗係腰瘦減，
（夢梅接唱）一般貌似花，丹青仙姿兩瀟洒。
（麗娘接唱）被冷煙冷煙蓋玉顏，銷毀了鉛華，驟降丹青價咯。
（夢梅情狂接唱）鴛鴦帳裡同夢去囉（擁麗娘）
（麗娘羞介閃開接唱）又怕冰肌凍著了郎又怕。
（夢梅接唱）唔怕，唔怕（一才收）（打二更介）
（麗娘更羞接唱）我又怕，又怕，聽二更斷續了兩三下。
（夢梅拖麗娘絳紗介接唱）怕月照香衾，且閉窗莫理他（欲拖麗娘上小樓介）
（麗娘慢的的百感牽懷，微微搖頭飲泣介白）唉口也......相公......柳郎......公子......（乙反木魚）唉，未閉西窗容我講句傷情話。宋玉都應憐薄命花。。決不是秋風秋雨催人嫁。當解花有根原玉有芽。。
（夢梅白）小姐，我知道你係一點冰清，不是亂紅衰柳口既，咁到底小姐你......
（麗娘續唱）麗娘亦有千金價。我係出黃堂太守家。。劫餘尚記我口既爹娘話。（啾咽介）佢話我係崑山良璧玉無瑕。。（泣不成聲禿頭花）唉，祗為驚夢遊園，空累我爹娘掛。（慢的的回憶爹娘逐漸悲介）
（夢梅食住慢的的感悟介白）口下，驚夢遊園......遊園驚夢......哦（中板下句）一句驚夢遊園，一段丹青畫戀，根深蒂固早連芽。。當日在柳川，曾夢會一佳人，小立在梅花樹下，佢招手問姻緣，夢醒難再續，夢梅兩字我為記情花。燈下看丹青，執手問嫦娥，嗟莫是夢中人也。（一才收）
（麗娘食住一才向夢梅點首而泣介應白）係
（夢梅亦相對飲泣介續唱）唉口也，卿果是夢中人，我是黃梁客，小樓是引渡口既仙槎。倩丹青作良媒，雖未有十斛量珠，望他日文章有價。不在梅邊在柳邊。若許夢梅能折柳，做一個蟾宮客耀才華。。（花）我帶著一表寒酸，兩袖清貧，拜上黃堂談婚嫁。
（麗娘為難介又微微搖頭介白）慢...（花下句）你休向堂前求父母（一才）
（夢梅白）哦，莫非宰閣嫌貧呀。
（麗娘搖頭白）唔係（續唱）我恐觸親心會淚如麻。。
（夢梅白）咁梗係太守堂中，不容一個白衣女婿哩。
（麗娘難搖頭介白）唔係哩（續唱花上句）冷香閨，三載悄無人。（介）
（夢梅白）小姑居住梗係悄無人啦。
（麗娘難於解答，淒然輕輕頓足介續唱花半句）剩牙床蛛網塵封殘月下。（向梅搖手表示勿去）
（夢梅嘆息介花下句）唉口也，哦重估話花徑不曾緣客掃，待郎採折武陵花。花是有情花，嗟我未成名終是假。（過位小立芭蕉之前垂手無語介）
（麗娘心不忍叫白）柳郎...柳郎，你誤會我囉，我唔係咁口既意思口既，唉（起排子頭白頭吟引子）（麗娘含情如怨如慕，如泣如訴，輕輕走埋牽夢梅衣袖，復開台口的的起小曲白頭吟）痴心經已贈君，休要弄碎情芽，麗娘心千般痛呀，請對奴笑番口下。（白）柳郎，我要你笑。
（夢梅向麗娘破啼一笑介）
（麗娘序白）乜笑得咁肉酸口既唧，我同你有生死之情，梗願訂生前之約口既（曲）嗟我冰雪身都已經硬化，似易散口既雲霞，不堪提往事，真難言說話，呀，借燈謎，我願君你權度口下。（指秋燈食住序白）咁啦，不如我打個燈謎你猜口下好嗎？你聽住叻，燈已滅，緣已絕，待等君來臨秀穴，如今都仍是半明滅，你諗口下，你明唔明白呀？
（夢梅懵然搖頭介白）我...我唔明白。
（麗娘續白）你諗真口下啦，唉，點解你個人咁聰明，而家忽然會咁蠢口既呢，唉（續唱白頭吟）妾長眠柳蔭，蓋面憑絳紗，在梅林夜聽秋雨，任由它飄飄向墓洒，一坏冷土是我家，風吹雨打（寶子回頭玩）（白）柳郎，咁你明白未唧？
（夢梅不明白）我...我真係唔明白呀。
（麗娘續白）本來我同你情意正濃，我都唔想講你聽口既，但我而家講到咁明，乜你都重未明白咩。
（夢梅白）什麼秋燈，什麼夜雨，盡是閨門傷春之句，咁我又猜口下啦。（一路踱一路念）燈己滅，緣已絕......（介）
（最良拈燈食住寶子上偷聽介白）書齋都燈已滅，何以對樓情未絕呢，嚦嚦鶯聲殘樓月。哼，你慌唔係口個個壞鬼書生發寒熱咩，如果唔係呢，就梗係收埋個小道姑口係裡面談風月，好，等我閱你一閱，若果真有其說，你都幾難走脫（一搖三擺上樓敲門食住三才白）開門。
（夢梅食住三才白）邊個...邊個？
（最良白）係我，送茶口黎。
（麗娘台口自然自語介白）哦...我認得叻...係我口地陳老師口既聲音口黎口既。
（夢梅大驚執麗娘口古）弊叻...弊叻...麗娘，你係太守千金，我係秀才落拓，兩人都要顧體面口架口番，若果洩漏春光，豈不是惹人笑罵。
（麗娘笑介口古）你咪咁傻啦，你睇口下冷月照人，秋燈放亮，無路可逃，我避無可避口架，你不如索性去開口左度門啦。
（夢梅更茅介口古）開門喎，得了口既咩，男女授授不親，何況斗室幽歡，甚於瓜田李下口架。
（最良催開門聲，夢梅茅極了）
（麗娘忍笑不唆介口古）唔怕哩，自古話有緣千里能相會，無緣對面都不相逢口架，我見佢，佢唔見我口既......
（夢梅不明介白）點解佢唔見妳呀？
（麗娘應白）係...睇口下...佢蒼蒼白髮叻口番，咁梗係老眼昏花啦嘛，去啦...（企於樓畔花蔭之下）
（最良門外白）喂，開唔開？唔開，我就撞門而......（介）
（夢梅急白）開緊叻...開緊叻（衝上小樓開門介）
（最良白）緊...開緊，哼，幹得好事呀...做得好事（拈燈慢的的一步步照梅下芳苑，後向蕉樹下照介）
（麗娘忍不住喏聲笑介）（托琵琶獨奏）
（最良聽到女子笑聲）做咩呀...做咩呀，邊個笑？
（夢梅急應白）咪我笑囉，嘻嘻...嘻嘻...
（最良白）唔係你笑得咁肉酸口既，頭先寧寧舍舍笑得好好聽
口既，響下面口黎口既，等我落去睇口下。
（夢梅大驚白）冇人呀......
（最良白）乜冇人呀，我要照一照咋......
（麗娘亦向梅做手關目表示莫驚介）
（夢梅看見麗娘大驚，發抖，向麗娘做手關目表示使其速趨避介）
（最良眼看見梅所向之地秉燭埋三照介）
（麗娘食住三閃介）（舞蹈介）
（夢梅以為必見麗娘台口戰慄不敢看介）
（最良白）喂...喂...開口黎...開口黎（口古）我睇你呀，唔係有多少神經病，你都梗係故弄玄虛想遮瞞我定叻，喂...喂，我明明聽見間房裡頭有嚦嚦鶯聲，你睇你梗係收埋個小道姑口係西窗共話哩。
（夢梅口古）陳老師，你千祈唔好咁講呀，小道姑係一個出家人，持齋拜禮，我係讀書人，你唔好玷辱了百練袈娑呀。。
（麗娘食住此介口古掃落花盈握，輕盈埋洒於最良面前，又輕盈走開介）（舞蹈介）
（最良左顧右望，不見有人介）
（夢梅又向麗娘做手關目怨其太冒險介）
（最良口古）奇叻，點解呢？諗諗口下我身前又冇花，身後面又冇花，點解有口係頭殼頂一片片咁飛落口黎...唔...呢度唔係狐舍，就鬼墟，想落有口的可怕。
（夢梅口古）唉，老師，呢間係南棲，就唔係狐舍，芳苑，唔係鬼墟，不過係你老人家疑心生暗鬼唧，邊度有事幹得口架，番去早口的抖啦，何必口係處枉作搜查。。
（最良笑介白）你慌我怕鬼咩，我幾廿歲唔怕鬼口既（花下句）我係老儒生懷中藏古玉（一才）批夜卷，掌上有硃砂。。
（麗娘聞言驚慌閃在梅後邊介）哦
（最良花）等我照一照芭蕉樹，閃一閃映泉燈，忙忙解玉燈頭掛（解玉掛於燈後，欲向蕉樹照介）
（夢梅以身攔麗娘三阻介鑼邊風起，麗娘避入畫旁卸下即起清煙一縷介）
（最良口古）喂...喂，秀才口黎...口黎，我明明見到一個影子閃在你身後，點知我一照，佢就好似化作一縷煙咁，咦，好似入
口左幅丹青畫裡面（著力一點）喂，呢一幅到底乜口野畫口黎呀？
（夢梅不明介白）點解忽然間唔見口左佢呢？（驚魂未定坐於石鼓上喘息介口古）老師，我而家實在都神昏智亂叻，你...你自己埋去睇真口下啦。
（最良喃喃自語白）梗睇啦，口合...明明係有一影子縮口左入畫
口黎口既，唔通古畫成精......（埋看重一才慢的的由啾咽轉大哭介）
（夢梅愕然白）咦，老師，點解你見幅畫會喊起上口黎呀？
（最良乙反木魚）老淚縱橫聲咽啞。丹青畫的是麗春花。。立雪程門真聲價。累得我飯後尋思午響茶。。麗娘對我情非假，教我如何不想她。。喂，你幾時偷入靈台下。何解你盜取描容掛在衙。。（怒白托寶子）柳夢梅，我以為你係一個寒酸口既秀才，點不知你係一個脂粉客，你千唔該，萬唔該盜取小姐描容，掛在疏簾自賞，你盜得描容，自然會勾三搭四（介）我正話明明聽見有女子之聲，緣何不見女子之面，唔駛審，你梗係收埋個小道姑口既（一才）
（石道姑引韶陽女聞聲食住寶子上介）
（夢梅食住一才搖手作否認介）冇哩
（最良迫前一步怒介白）我明啦，小道姑梗係啦，佢又生得青靚又白淨，今日日間在梅花庵觀你經已同佢眉來眼去（催緊）柳夢梅，我限你在半個時辰，將呢個小道姑從樓內交出，否則我就拉你上道錄司衙，問你一個穢亂庵堂，勾搭道姑之罪，拉你...（作狀欲拉介）
（石道姑韶陽女食住此介口推門而入下樓介）
（最良見女等從外入瞠目啞口介）
（石道姑口古）陳齋長到底柳秀才有乜口野事犯親你，令到你夜扣南樓連宵叫罵。
（最良吶吶不答介）
（韶陽女口古）陳齋長，我方才口係小樓之外，聽見你右一句小道姑，左一句小道姑，到底小尼姑有乜口野同你過唔去呀，你唔應該污辱了清白人家。。
（最良口古）石姑，今晚呢件事，非同小可，我適間明明聽見南樓之內，細語喁喁，鶯聲嚦嚦，到底呢個小道姑口係房內而出，就口係房外而入呀？你話晒上口左年紀口既人，應該講番句老實話呀。（韶陽暗啐羞介）
（石道姑正容口古）老冬烘，自黃昏起，小道姑都陪我在經堂敲誦，一直到現在陪我到口黎，未有離開我半步，你都分明係無風作浪，過事喧嘩。。（拂袖介）
（夢梅白）老師，咁你明白啦，你冤枉人呀。
（最良白）咪嘈，哈...奇叻（過位執石姑）芳苑無人，莫不是樓中有鬼...唔係...唔係（口古）假如我有冤枉佢，我就甘受雷劈天打。口拿石姑，除口左妳呀...妳兩隻道姑之外，太守衙內何處更有嬌娃呢。。舊時陣都重話有...重有個杜麗娘小姐呀，可惜佢都死口左三年長（一才）
（夢梅食住一才由石鼓跌落地驚介）哎口也
（最良續口古）三尺桐棺都怕已隨風物化。你驚哩...驚哩，芳苑都更無紅粉在，莫非天女無端夜散花咩。。
（石道姑白）秀才你唔駛驚慌，陳齋長，冇謂多事叻，咁夜搔擾口地清雅唔好呀，求其事幹過得去就了囉，休息口下罷啦。
（韶陽女對夢梅本有愛心，乘機走埋扶起梅介白）秀才，睇口下你呀，慌到手騰腳震做乜口野呢。
（石道姑白）小道姑，明日就係杜小姐三年忌日，理該在佢墳前化些紙帛，你同我入去早為打點，呀秀才，你休息口下，陳齋長，唔好多事叻，返去書齋啦。
（最良白）豈又此理，你快的交出口黎呀，唔交出口黎，我梗拉你上道錄司衙口既，你記住口黎...
（石道姑、最良與韶陽女上樓同下介）
（夢梅頹然坐下沉花下句）唉口也，說什麼丹青配，祗不過係霎眼煙霞。。
（鑼邊起風吹熄燈介）
（麗娘食住鑼邊在什邊樓畔花蔭卸上）（先起清煙一縷，最好能從舞台底慢慢昇起，即氣芬更好，起雙星恨譜子上前細聲叫白）柳郎...柳郎...（牽其衣袖介）
（夢梅仰視麗娘重一才大驚介）哎口也...哎口也...妳...妳
（麗娘見狀慢的的關目悲咽口古）柳郎......莫非你猜透了燈謎，不用麗娘點化口架？
（夢梅頻頻點頭但仍發抖口古）原來你講燈...燈已滅，緣已絕，原...原來你係一隻...一隻夜鬼回衙。。
（麗娘的的 一才反應用沉鬱之聲白)口下，夜鬼回衙呀...唉（行開兩步，帶點自愧心情，起姬花下句）艷質久塵埋，冷落泉台下，身在桐棺伴冷霞，由來鬼物招人怕，試問誰甘夜接鬼回衙。。（悲泣介）一夢死三年，一見了三生，祗剩得一段人鬼相思留...留佳話。。（欲下介）
（夢梅連隨跪前，緊執麗娘白）哎口也，麗娘...麗娘，妳唔好行（起小曲人鬼戀（諧另錄））麗娘...係鬼也不驚怕，我抱膝慘喚麗娘向地爬。你為我死，香銷鏡花，我哭句曲終線斷空抱琵琶，拜艷屍抱落霞（寶子重玩懇切痛白）麗娘...麗娘，我同妳夢中生情，妳為我而死，生不能為我婦，死亦當為我妻，麗娘妻，你...你稍候我片時，待我復上小樓懸樑自盡，那怕陽間難配偶，我口地地府都可成家...（欲上小樓介）
（麗娘阻止介白）哎口也，慢...（小曲人鬼戀，前譜唱）夢梅...不枉我傾心也，抱君慘喚夢梅血淚瑕。你肯為我死，施恩更加，我不怨天不怨地，反覺榮華，復活花再萌芽（寶子續玩一路一路白）柳郎...柳郎...如果你唔講出呢一番衷心說話，我就算係雖可回生，亦羞慚復活囉，柳郎夫...（略掩袖遮掩羞介）
（夢梅應白）麗娘妻...
（麗娘續白）我當年雖為落花驚閃而亡，猶幸十殿閻君佢翻檢姻緣部冊，話註定我同你先有幽歡（介）後成明配...所以雖登鬼錄，我都未損人身。今日我陽錄將回，陰數都已盡囉。日前為柳郎而死，我今日為柳郎而生...（懇切地催快）柳郎，你若能在明日未過辰牌剜碎桐棺，我同你都尚可再續姻緣之份呀。
（夢梅半信半疑介白）麗娘...麗娘...世間上只有精靈不死唧，邊處會有三載回生之理呀？
（麗娘聞語緊執夢梅介白）柳郎，我點會呃你呢，口拿，麗娘尚有叮嚀我願君記取，你既以我為妻，勿誤我辰牌時份，否則過了冥期所限，即今生（一才）亦難再有相見之日矣。（聞遠處雞啼）唉口也，我...我要走叻。（急下介）
（散天露微光介）
（夢梅叫白）麗娘...麗娘妻...麗娘...（花下句）等我破棺重接再生花。（手忙腳亂，拈花鋤，急從衣邊下介）（落幕）
～完～(取消) 分类：艺术
标签：仙鳳鳴 幽媾 之 牡丹亭驚夢
频道：粵劇粵曲（視頻） 中國戲曲（視頻） 粵劇粵曲（音頻） 中國戲曲（音頻） 李龍 龍藝粵韻（音頻） 李龍 龍藝粵韻（視頻） 懷舊金曲（視頻） 懷舊金曲（音頻） 懷舊電影（視頻） 喜慶賀年專輯（音頻） 喜慶賀年專輯（視頻） 國樂妙韻（音頻＋視頻） 佛光普照（梵音佛樂頌唱） (更多)
在线播放地址：
html嵌入代码：
bbs ubb 代码：
FLASH视频地址：
Copyright © 2004-2010 我们的生活有声有色 合作联系电话：010 62668979
